المظاهرة التاريخية لفصل اولى سابع بمدرسة كفرالعلو الاعدادية

%d9%85%d9%88%d8%b3%d9%89-%d9%85%d8%ad%d9%85%d8%afفي اولي اعدادي كنت في فصل اولي سابع ..ودا كان اسمه الفصل الطاير في مدرسه كفر العلو الاعدادية المشتركه بحلوان.. ومعناه اننا بلا فصل حقيقي كنا بنقعد علي التوخت في الحوش لحد ما فصل من الفصول ينزل حصة العاب وندخل مكانه نكمل جدولنا .. وكانت مأساه بنعيشها كل يوم . ومحدش من اولياء الامور كان شاغله الموضوع . لحد ما في يوم سمعت مدرسين بيتكلموا علي فصل الصناعي والتدبير المنزلي اللي مابيتفتحش ولا العيال بتستفيد منه وانه ممكن يستغل .( ومعرفش ايه اللي خلاني وانا عيل في اول سنه اعدادي افكر في اللي هاقولكم عليه دلوقت

 

madraset-kafr-el3elw
اختمرت في دماغي فكرة اني اخد كل الصبيان ونسيب البنات ونطلع علي الاداره نشتكي الناظر ( كان اسمه محمد صادق وكان شبه الممثل اللي قتل رشدي اباظه في فيلم الرجل الثاني وبنضاره سودا) وكان مرعب
ورغم كدا الفكره تربست في دماغي وفعلا نجحت في اقناع كل اصحابي ممدوح ومعوض ومعروف و10 تانين وفعلا روحنا الاداره التعليميه في حلوان وعملنا مظاهره هناك اه والله جنب مسجد المراغي سنة 1983 تخيل

 


خرج لنا واحد واستفسر عن طلباتنا فانا شرحتها له بصوت عالي وساعتها دخلت معاه لحد مديرة المرحلة الاعداديه وقعدت اشرح لها كل المعاناه اللي احنا عايشنها وازاي الناظر بياخد 700 جنيه كل شهر لاوضة الصناعي ( زي ما استاذ سعيد بتاع الانجليزي فهمني وحرضني )

 


المهم كان المشوار دا يوم التلات والمديرة وعدتنا انها هتحل الموضوع تاني يوم ) وعدي التلات ويوم الاربع فوجئنا بالناظر داخل لنا الفصل اللي كنا فيه ساعتها وعنيه بتطق شرار وبيسأل عن العيال اللي راحت الاداره واشتكت امبارح واحنا كلنا بلمنا ومعروف صاحبي كان قاعد جنبي وبيفكر يقوم يعترف فانا مسكت ايده وقلت له ماتخفش احنا ما سيبناش اسماءنا في الاداره .. المهم ان كان استاذ محمد شبيكه مدرس العلوم الله يرحمه اقترح فكره عبقريه يعرف بيها مين اللي راح يشتكي في الاداره وهي انه يحيب كشف غياب امبارح ويعرف مين اللي غاب وساعتها يبقي هما اللي راحوا الاداره

 


ما اطولش عليك يا صديقي وقبل ما يجيبوا كشف الغياب كانت لجنة تانية من الادارة تحت
وخلص اليوم وكلنا مانمناش في اليوم دا ولا حتي حد فينا قدر يحكي لاهله علي اللي حصل ولا اللي هيحصل يوم الخميس لاننا من الاخر كنا عارفين اننا ( هنتفشخ )
ورحنا المدرسه ووقفنا الطابور وجاءت كلمة السيد ناظر المدرسه الاستاذ محمد عبده شاكر
النااااظر الجديد هههههههه

 


وكل فصلنا سقف وصفر والمدرسه كلها عملت زينا والناظر الجديد اعتبرها تهنئة بقدومه ولكن محدش غيرنا في الفصل عرف اللي حصل الا الشله بتاعتنا واستاذ سعيد مدرس الانجليزي اللي اصبح موكل عندي فيما بعد وكل ما يقابلني يفكرني اني كنت طالع محامي من صغري رغم اني كان نفسي اطلع سواق عربيه نقل

بقلم : موسى محمد موسى

المحامى

تعليقات فيس بوك

اضف رد

لن يتم نشر البريد الإلكتروني . الحقول المطلوبة مشار لها بـ *

*