يوميات محامى : قاضي النهارده في جنح مستأنف حلوان : موسى محمد

موسى محمدموسى

     موسى محمد موسى

الناس مختلفه علي اداءه .

هو في الغالب بيرفع الحبس لكن بيرزع غرامة تسمع في بواسير المتهم .. وبصراحة انا شخصيا باعتبره كويس الي حد ما من ناحية عملي كمحامي يهمه ان موكله مايتحبسش … دي مقدمة لما حدث في حلسة النهارده .

وهي لموكل مقاول كبير ومشهور . الادارة الهندسيه عندنا شكته محضر بناء بدون ترخيص في ( الكليتش) وقاضي اول درجة بيعتبر نفسه فرعون ولا بيحيل القضايا لخبير ولا لطب شرعي ?عامل فيها ( الباز افندي) المهم رزع صاحبنا سنة وكفالة 5000 جنية ورفض احالة الدعوي للخبير .

 


عملنا استئناف وكان جلسته النهارده ..وهو دي بيت القصيد والقصد من هذا البوست عشان نحكم علي بعضما ونشوف احنا اطهار انقياء ولا بشر ويعشقون الفساد .. نبدا سوا الخطوات واحدة واحده وعد معايا الفلوس اللي اتدفعت عشان الموكل ( برنس ) ومش عايز يتحبس ولا يدخل القفص كمان ?
.. 9 صباحا اول اصطباحة للمعلم السكرتير 100 ج حلو كدا من غير اي حاجه
كنا رول واحد حضرنا علي عسرة اترافعت وقدمت مستنداتي والقاضي قال اخر الجلسه وطبعا اخر الجلسه دي يعني البرنس هيدخل القفص

 


سيبته يدخل القفص لان القاضي شغال علني ومايتفعش يخرج ..
ااقاضي خلص الجلسه علي 11 واهل البرنس وشريكه مصرين علي خروجه من القفص .. ودي بداية الشغل والعد … اول 500 لاتنين حراس عشان طلعوا البرنس وقعد بره والفس مليان متهمين فوق بعض واللي يدفع بيخرج ( وفر غضبك ونصيحتك باننا نشتكي للقاضي وكدا عشان دا معناه ان الموكل نفسه مش هيرضي)
المهم يا عمنا ..خرج القرار بتعديل الحكم ورفع الحبس والاكتفاء بتغريم البرنس ( مثلي قيمة المخالفة) يعني 120000 ج

 


وبكدا بقي انا بيعتبر خلصت شغلي القانوني ولكن الموكل ما يعرفش كدا ..لانه بيتعامل مع المحامي بخدمه مابعد البيع ( يعني خرجني)
وعشان تخرج متهم بغرامه في جنح مستأنف بعد 2 الضهر معناه انك هتهلك صحة وفلوس
وبدا الطحن يا سيدنا
السكرتير اخد 1000 عشان يخرج القضية بالقرار والبطاقه وللعلم هو عايز كمان 1000 تخيل .
والسكرتير الشريف دا بعد ما قفش ال1000 ج سلم الملف للحرس عشان يرزقوا ?

 


ودول طلبو لنفسهم 800 ج عشان يقسموا نفسهم نصين نص يفضل في الجلسه ونص يطلع بالورق معانا للدور الخامس عند المطالبه والكمبيوتر .
المهم ان الموكل وافق يديهم ال800 .. تفتكر كدا خلصنا !!؟؟ لأ يا حاج والله دا كدا بدأنا مهزله تانيه
الحرس سلم الملف للحجاب (3 حجاب) وطلعوا واحدمنهم مع الحرس والورق والمتهم فوق في الخامس
ودول اخدوا 600 جنيه عشان مايزعلوش

 


دخل الورق عند موظف عامل فيها ( حاليا ) انه شريف رغم ان اغلب مصالحة ورشاويه كانت سندوتشات جمبري .. المهم الزبون ما خلصش المطالبه الا بعد ما استلم 250 جنيه عشان يحصر القضيه ..تفتكر كدا خلصنا دفع ؟؟!!?
لا والله ما خلصنا.?
رحنا الخزينه عشان ندفع ال 120000 ج
وكنا وصلنا للساعة 3 عصرا

 


تفتكر موظف الخزينة يطلع مننا فلوس ازي ؟ قول كدا يطلع مصلحة ازاي !؟
المعلم طلب مننا ننزل نعد الفلوس علي المكنه في الارضي ونختم ورقه بان الفلوس مش مزورة ههههههههههههه اه والله وهنا البرنس اتعصب وقالي ادفع له خلينا نخلص
المهم موظف الخزنه بلع 100 ج وختمنا وخلصنا علي 3 ونص وخرجنا وموكلي البرنس شم هواء الحرية ونسيم الشارع وبص وقالي بالنسبه لحسابنا مع بعض يامتر فدا هيبقي يوم السبت ان شاء الله ??????
تفتكروا عملت فيه ايه؟؟؟

المحامى بالنقض

موسى محمد موسى

تعليقات فيس بوك

تعليق واحد

  1. عاوزين السلبيات والايجابيات يااستاذ موسى

اضف رد

لن يتم نشر البريد الإلكتروني . الحقول المطلوبة مشار لها بـ *

*