طفلك كان بيتحكم في البول ودلوقتي رجع يعمل على نفسه تاني؟

كتب الدكتور احمد امين على صفحتة الخاصة على موقع التواصل الاجتماعى فيس بوك حول اسباب عودة الطفل فى عدم التحكم فى البول مرة أخرى وشرح الاسباب : قال
شوفي يا ستي .. لو لسه مكملش ٤ سنين .. ولو لسه مكملش ٦ شهور على بعضهم متحكم في نفسه تماما .. طبيعي جدا انه ممكن يرجع يعمل في البامبرز تاني خصوصا في اوقات البرد او لما يبقى خايف او متوتر او عيان .. مش هنشغل بالنا قوي و ان شاء الله هيرجع يتحكم تاني لوحده

طيب غير كده ؟ .. لازم نقلق و مناخدش الموضوع ببساطة .. ليه ؟! لان في اسباب مهمة جدا ممكن تكون السبب و لازم نستبعدها او نلحقها بدري زي :
مرض السكر !! من اشهر اعراضه عند الاطفال و للأسف بتعدي على ناس و دكاتره كتير .. لما تلاقي طفلك ابتدى يشرب مية كتير بزيادة و بيخس و ابتدى يعمل على نفسه لازم نستبعد مرض السكر .. نكتشفه في المرحلة دي افضل بكتير من اكتشافه لما الطفل يدخل في غيبوبة
 
 
التهابات مجرى البول !! عارفين الطفل مش زي الكبار .. التهابات مجرى البول مش بتظهر بنفس اعراض الحرقان و الوجع و الكلام ده .. ممكن يكون ده العرض الوحيد لها .. و لو الطفل رافض الأكل و بيسخن عاى فترات و مش عارفين سبب لده يبقى لازم نفكر بقوة في كده
 
 
ديدان البطن و خصوصا لما يكون التبول ليلي .. و شرحنا الموضوع ده في بوست قبل كده
الإمساك المزمن: ((أقل من مرتين اسبوعيا مع صعوبة وقت التبرز و البراز يكون ناشف)) .. نعالج الامساك لو موجود قبل ما نفكر في علاج التبول اللا ارادي
اللحمية: من اهم الاسباب خصوصا لو التبول ليلي لا الطفل بيعرف ينام بالليل ولا بيركز في النهار و بيفقد قدرته على التحكم .. و علاوة على كده .. اللخبطة دي مع نقص الاكسوجين في الحسم بتخلي الجسم يفرز هرمونات تزود انتاج المية و تزيد الطين بله ..
 
 
المشاكل العصبية : لازم لازم لازم تستبعد و بسرعة في الحالات دي .. خصوصا لو الطفل مشيته ابتدت تبقى غير متزنه او ابتدي يقع كتير ..
مشاكل الكلى و الهرمونات : تحليل البول بيدينا لمحة عن كده و لازم نستبعدها في الحالات دي
مشاكل نفسية ..
اخطرها التحرش الجنسي
و اشهرها وجود مولود جديد و خصوصا لو الاهل بيغلطوا الغلطة الشنيعة بتاعت انهم بيغيروا للمولود الجديد و يلاعبوه قصاد الطفل التاني .. شوية بوس و احضان و مناغشة بيترجمها الطفل الكبير بصورة اوتوماتيكية على انها مكافئة للبيبي انه عمل في البامبرز !! ناخد بالنا من النقطتين دول كويس جدا !!
 
 
ده غير بعض الاسباب التانية..
الخلاصة : حكاية ان الطفل يتحكم في نفسه و بعدين يرجع يعمل تاني مينفعش ناخدها ببساطة كده و لازم ندور على الأسباب اللي ادت لكده ! ناخد بالنا من فضلكم
تعليقات فيس بوك

اضف رد

لن يتم نشر البريد الإلكتروني . الحقول المطلوبة مشار لها بـ *

*