شعر : قصيدة خيال مأته للشاعر المصرى احمد الصارم

ماهو فيلم رعب ومثلوا
لازم نموت لجل البطل
أومّال فاكِرنا هنقتله ؟!
لازم يعيش ويدوس كمان


واحنا الفيران
جوّا الجحور متلتلة
أصل اللي زيي وزيهم
في شرعهم
يتحسبوا حسبة قليلة.


وبالكتير
نطلع في مشهد مشهدين
(عشان نموت)!!
يبقي الحكاية وباختصار
(أنا اختيار)
أنا الأداة متحركة
في صورة قرار
وخروجي برة الشرنقة
يعني انتحار
إلا إذا ..


اللي اتقتل واللي اتسجن واللي اتأذي
كتبوا السيناريو من جديد
و الشرنقة لو من حديد
هكسرها واخرج منَّها
والعن معاهم سجنها
والخوف بحاله هينقرض
والفيلم قبل مايتعرض
هيكون نَجَح ..!!


والنخلة بعد سنين عجاف
تطرح بلح
واللي طموحه كان في يوم
تمن الرغيف
هيكون شبع
وساعتها يبقي السيل قوي
تطلع معاه كل (البقع)


خيال مأتة .. بكل حُرقة
لحد حلمي في يوم مايبقي
ويكون ربيع بعد الخريف
أما إجابة الأسئلة
أنا مش ضعيف
#خيال_مأته
#احمد_الصارم

تعليقات فيس بوك

اضف رد

لن يتم نشر البريد الإلكتروني . الحقول المطلوبة مشار لها بـ *

*